2016 Salutatio
Esther Kim
Habita in Comitiis Academicis Princetoniae
In Nova Caesarea prid. Kal. Iun.
Die XXXI Maii
Anno Salutis MMXVI
Anno Academiae CCLXIX
Academiam eiusque auditores cano, qui omnibus ab terris
Ad Novam Caesaream ierunt,
Ad Fristum et Streetum…
Hos versus non intelligitis; quid autem novi est? Hoc modo annos quattuor egistis, semper orationes collegarum professorumque mirantes. Per multa praecepta pugnantes, tandem ad nostros ultimos ritus advenimus. Tempus fugit! Nunc, in verbis Ellae Woods, “Vobis,” inquam, “gratulationes, classis duorum milium sedecim — id fecimus!
Caerimonia incipiat — si cito incipimus, citius triumphus noster portam per quam ire non ausi sumus (absurde) transire poterit. Primum saluto te, praeses Eisgruber, imperator huius academiae gloriosae. Per multa proelia ad victoriam nos duxisti. Deinceps honoratos curatores nostros salvere iubeo. Et vos, sapientes professores qui non laxamentum nobis dantes nos instituistis. Nos armavistis ut novas terras domemus. Et carae matres patresque, gratias vobis agimus. Magnum pretium solvistis (omni modo) ut hoc momentum temporis contingamus.
Et nunc vos saluto, mei dilecti collegae. Multas res communicavimus — vulnera vaccinis meningitis inflicta patientes, diluvies nivesque superantes, bella contra opera academica nostra gerentes (et saepe victi), etc. Ad astra per aspera. Etsi pro tempore nobis digrediendum est, non lacrimas fundamus. Sed denuo propediem conveniemus et noster reditus (et nectar mulsum ibi paratum) memorias dierum aureorum in animos reducent.
Hoc vobis relinquo: Carpite diem — et futuros annos! Milia benedictionum vobis. Carthago delenda est. Valete.
