2018 Salutatio
Katherine Lim
Habita in Comitiis Academicis Princetoniae
In Nova Caesarea Non Iun
Die V Iunii
Ab Urbe Condita MMDCCLXXI
Anno Communis Saeculi MMXVIII
Anno Academiae CCLXXI
Concede mihi, Musae, fortitudinem ut de proeliis et victoriis magnae classis nostrae canam quae per campum quattuor praeteritos annos vagata est.
Primum te saluto, praeses Eisgruber, princeps magnae universitatis in qua floruimus. Sub ductu tuo et eo curatorum, academia nostra prosperat.
Secundum vos saluto, honesti professores, duces periculosorum nostrorum itinerum per academica aspera. Ab Orientali Pyno ad Quadrangulum Scientiae Ingeniariae, sapientiam communicavistis ut mentes curiosas excoleretis.
Nunc, vos saluto, parentes et familiae, fautores scholasticorum conatuum. Nisi vestrum amorem donavissetis, magnas altitudines ad quas pervenimus non ascendissemus. Summum pretium pependistis ut nos huc ēmitteretis: nunc videte quid perfecerimus.
Denique, vos saluto, condiscipuli, comites per matutinas auditiones et insomnes noctes. Coniunctim proelia gessimus cum multis libellis et agminibus problematorum—sed ecce! Vicimus omnes.
Nunc domo quae educavit in terras incognitas ultra magnam universitatem proficiscamur. Inveniatis prosperitatem quacunque vestra itinera tendatis. Sed primum victorias quattuor praeteritorum annorum celebremus.
In celebratione egregiorum factorum nostrorum, salvete omnes.
