Manuscript U

 
                7001 La s'an vont tuit, nus n'i remaint;
                7002 Et as fenestres revont maint,
                7003 La reïne, dames, puceles
                7004 Dom avoec li avoit de beles.
A C E F G I T V 7005 En la lande un sagremor ot
                7006 Si bel que plus estre ne pot:
                7007 Molt tenoit place, molt est lez,
                7008 S'est tot antor selonc orlez
                7009 De menue erbe fresche et bele,
A C E F G I T V 7010 Qui an toz tans estoit novele.
                7011 Soz le sagremor gent et bel,
                7012 Qui fu plantez del tans Abel,
                7013 Sort une clere fontenele
                7014 Qui de corre est assez isnele.
A C E F G I T V 7015 Li graviers est et biax et genz
                7016 Et clers con se ce fust argenz,
                7017 Et li tuiax, si con ge cuit,
                7018 De fin or esmeré et cuit;
                7019 Et cort parmi la lande aval,
A C E F G I T V 7020 Antre deus bois parmi un val.
                7021 Iluec plest le roi qu'il se siee,
                7022 Qu'il n'i voit rien qui li dessiee.
                7023 Les genz fet treire bien an sus;
                7024 Et Lanceloz molt tost cort sus
A C E F G I T V 7025 Meliagant de grant aïr,
                7026 Con celui cui molt puet haïr.
                7027 Mes avant, einz que il le fiere,
                7028 Li dist a haute voiz et fiere:
                7029 «Traiez vos la, je vos desfi!
A C E F G I T V 7030 Et sachiez bien trestot de fi
                7031 Que ne vos espargnerai point.»
                7032 Lors broche son cheval et point
                7033 Et arriers un petit se trait
                7034 Tant de place con uns ars trait;
A C E F G I T V 7035 Puis lessent l'uns vers l'autre corre
                7036 Quanque cheval lor porent corre,
                7037 Si s'antrefierent maintenant
                7038 Es escuz qui bien sont tenant,
                7039 Qu'il les ont tröez et perciez,
A C E F G I T V 7040 Mes l'uns ne l'autres n'est bleciez
                7041 N'an char conseüz a cele ore.
                7042 Lors passent oltre sanz demore,
                7043 Puis se revont granz cos doner,
                7044 Quanque chevax puet randoner,
A C E F G I T V 7045 Et escuz qui boen sont et fort;
                7046 Et il resont de grant esfort,
                7047 Et chevalier preu et vassal,
                7048 Et fort et isnel li cheval.
                7049 Et a ce qu'il fierent granz cos
A C E F G I T V 7050 Sor les escuz qu'il ont as cos,
                7051 Les lances sont oltre passees
                7052 Qui fraites ne sont ne quassees,
                7053 Et sont a force parvenues
                7054 Desi qu'a lor charz totes nues.
A C E F G I T V 7055 Par grant vertu l'uns l'autre anpaint,
                7056 Qu'a terre se sont jus anpaint,
                7057 Ne peitrax ne cengle n'estriers
                7058 N'i pot eidier, que par derriers
                7059 Chascuns d'ax la sele ne vuide
A C E F G I T V 7060 Que de seignor fu tote vuide.
                7061 Estraier an sont li cheval
                7062 Qui s'an vont amont et aval;
                7063 Li uns regibe, l'autres mort,
                7064 Que l'uns volsist l'autre avoir mort.
A C E F G I T V 7065 Et li chevalier qui cheïrent
                7066 Plus tost qu'il porent sus saillirent
                7067 Et ont tost les espees traites,
                7068 Qui de letres erent portraites.
                7069 Les escuz devant lor vis metent
A C E F G I T V 7070 Et des ore mes s'antremetent
                7071 Comant se puissent domagier
                7072 As espees tranchanz d'acier.
                7073 Lanceloz nel redote mie,
                7074 Car il savoit plus d'escremie
A C E F G I T V 7075 La mitié que cil n'an savoit;
                7076 Car an s'anfance apris l'avoit.
                7077 Andui s'antrefierent granz cos
                7078 Sor les escuz qu'il ont as cos
                7079 Et sor les hiaumes d'or barrez,
A C E F G I T V 7080 Que fraiz les ont et anbarrez;
                7081 Mes Lanceloz le haste fort:
                7082 Si li done un grant cop et fort
                7083 Devant l'escu a descovert
                7084 El braz destre de fer covert,
A C E F G I T V 7085 Si li a colpé et tranchié.
                7086 Et quant cil se sant domagié
                7087 De sa destre qu'il a perdue
                7088 Dist que chier li sera vandue.
                7089 S'il an puet leu ne aise avoir,
A C E F G I T V 7090 Ne remanra por nul avoir;
                7091 Car tant a duel et ire et rage
                7092 Qu'a bien petit que il n'anrage,
                7093 Et molt po prise son afeire
                7094 S'un malvés geu ne li puet feire.
A C E F G I T V 7095 Vers lui cort, que prendre le cuide,
                7096 Mes Lanceloz bien se porcuide;
                7097 Car a s'espee qui bien taille
                7098 Li a fet tele osche an sa taille
                7099 Dom il ne respassera mais,
A C E F G I T V 7100 Einz iert passez avrix et mais;
                7101 Que le nasal li hurte as danz
                7102 Que trois l'en a brisiez dedanz.
                7103 Et Meliaganz a tele ire
                7104 Qu'il ne puet parler ne mot dire,
A C E F G I T V 7105 Ne merci demander ne daingne,
                7106 Car ses fos cuers li desansaingne,
                7107 Qui trop l'enprisone et anlace.
                7108 Lanceloz vient, si li deslace
                7109 Le hiaume et la teste li tranche.
A C E F G I T V 7110 Ja mes cist ne li fers ganche:
                7111 Morz et cheüz, fet est de lui.
                7112 Mes or vos di, n'i a celui
                7113 Qu'ilueques fust, qui ce veïst,
                7114 Cui nule pitiez an preïst.
A C E F G I T V 7115 Li rois et tuit cil qui i sont
                7116 Grant joie an demainnent et font.
                7117 Lancelot desarment adonques
                7118 Cil qui plus lié ne furent onques,
                7119 Si l'en ont mené a grant joie.
A C E F G I T V 7120 Seignor, se j'avant an disoie,
                7121 Ce seroit oltre la matire,
                7122 Por ce au definer m'atire:
                7123 Ci faut li romanz an travers.
                7124 Godefroiz de Leigni, li clers,
A C E F G I T V 7125 A parfinee LA CHARRETE;
                7126 Mes nus hom blasme ne l'an mete
                7127 Se sor Crestïen a ovré,
                7128 Car ç'a il fet par le boen gré
                7129 Crestïen, qui le comança:
A C E F G I T V 7130 Tant en a fet des lors an ça
                7131 Ou Lanceloz fu anmurez,
                7132 Tant con li contes est durez.
                7133 Tant en a fet, n'i vialt plus metre
                7134 Ne moins, por le conte malmetre.
A C E F G I T V 7135 Ci faut li ROMANS DE LANCELOT
                7136 DE LA CHARRETE